Xaviera Hollander

Se Vükiped: sikloped libik
Bunön lü: nafam, suk
Xaviera Hollander

Jiel Xaviera Hollander (1943 yunul 15) binof penan Nedänik, büo i jinepuedan ä jistelan biomagodemas genik.

Pämotof labü nem: Vera de Vries in Soerabaja (attimo in Lindän Nedänik) lä fat yudik: Michiel de Vries (1902-1973), dilekan malädanöpa in Soerabaja, e mot kritik Fransäna-Deutänik. Pos moted oka, el Hollander e mot okik päpladofs ini el Jappenkamp (seatöp pro Nedänans in Lindän Nedänik dü volakrig telid). Pos fin volakriga famül ofik älomädikon in Amsterdam.

El Hollander ävisitof eli Barlaeus Gymnasium, ägetof diplomi sekretana, ed ätävof lü Sulüda-Frikopän, e poso lü New York in Lamerikän, kö fino ävedof jinepuedan. Dö belifots okik äpenof bukis stedälik mödik, bevü kels i The Happy Hooker: My Own Story (Jinepuedan Läbik: Konot Lönik Oba, 1971, ISBN 0-06-001416-4), me kel äsevädikof in vol lölik. Ün 1982 päpübon tradutod Nedänapükik tiädü De happy hooker. Buk at ädistükon oki ün tim at sekü stedäl oka demü kosäd genik, e palecedon as sam literata genasiik ü geneflenik. Ävedon biomagodem labü as stelan jiel Lynn Redgrave. El Hollander epenof siso bukis votik mödik ed eprodof dramatis in Amsterdam. Buk lätik ofik, Child No More (No plu cil), binon konot neläbik deadama mota ofik.

Ün dekyel 1970 äpenof, dü yels anik, konsälapadüli pro timapenäd: Penthouse tiädü Call Me Madam (Nemolös obi lädi). Ün tim at älödof in Toronto (Kanadän), kö ämatikof ko Kanadänan ed äkompenof pö nitalif zifa. Äpubof i su tegäd labuna stimü els Beatles, in kel äkanitof eli Michelle.

Atimo cifof eli Xaviera's Happy House: lötidöp smalik in Amsterdam. Loatidof i domi ofik: Caprice in Marbella, Spanyän.

Tü 2007 dekul 26, el Hollander ämatikof ko flen lunüpik: Philip de Haan (bäldotü yels 53) in Amsterdam.


Lautots (lised no lölöfik)[redakönredakön fonäti]

  • The Happy Hooker: My Own Story (1971) (Jinepuedan läbik: konot lönik oba)
  • Xaviera goes wild (1974) (Jiel Xaviera sovadikof)
  • The best part of a man (1975) (Dil gudikün mana)
  • Xaviera's magic mushrooms (1981) (Garids magivik jiela Xaviera)
  • The inner circle (1983) (Sirkül ninik)
  • Fiesta of the flesh (1984) (Zäl gena)
  • Happily hooked (1985) (Läbiko emätiköl)
  • Erotic enterprises (1985) (Febs genik)
  • Prisoner of the firebird (1986) (Fanäb filaböda)
  • The kiss of the serpent (1987) (Kid sneka)
  • Kind af (2001) ISBN 9024541476 (No plu cil)

Yüms plödik[redakönredakön fonäti]