Dracorex
| iDracorex
Timäd fösilik: fin Kretata
| ||||||||||||||||
|---|---|---|---|---|---|---|---|---|---|---|---|---|---|---|---|---|
 Bomem elafa Dracorex hogwartsia.
| ||||||||||||||||
|
Edadeadöl (fösil)
| ||||||||||||||||
| Dadiläd nolavik | ||||||||||||||||
|
Elaf Dracorex äbinon dinosaur famüla Pachycephalosauridae se Nolüda-Merop finü Kretat. Bid patedik (ä teik) binon el Dracorex hogwartsia, siämü „drakareg se Hogwarts“. Sevädon stabü kran ti lölöfik, äsi särvigavirebs fol (kilid, jölid, zülid ed el atlas). Fösils at pätüvons in Fomam di Hell Creek in tat Lamerikänik: South Dakota fa löfälafösilavans kil se Sioux City (Iowa). Kran poso pälegivons Musede Cilas (Children's Museum') di Indianapolis ad pävestigön ün 2004. Päbepenon calöfiko ün 2006 fa hiels Robert Bakker e Robert Sullivan.
Naatom
[redakön • redakön fonäti]El Dracorex: planifidaf älabon su kran okik honedis tipik, bölis e snudi lunik. Distü limafs votik anik famüla: Pachycephalosauridae, el Dracorex no älabon flomi bobik: äbinon güo plenöfik. Fösils ädutons luveratiko lü yunaf, ab klülädü nivod bomükama virebas särvigik, yunaf at ya äbinon nilü mad. Koap onik älabon lunoti metas za kilas.
Patöfs votik ela Dracorex sümons ad uts elafa: Stygimoloch: limaf votik famüla: Pachycephalosauridae.
Nem
[redakön • redakön fonäti]Telnem: Dracorex hogwartsia, stabü mobs visitanas Museda Cilas di Indianapolis, stimon otüpo drakis (Dracorex sinifon: „drakareg“), ad kels nim at äsümon, e bukasökodi pöpätik: „Harry Potter“, fa jiel J. K. Rowling pelautöli (hogwartsia pedefomon de el Hogwarts: nem magivanajula, kö studom hiel Harry Potter). Tefü nem at, jilautan äsagof:
„Binob lefredik ven tikob, das magivajul: Hogwarts epladon (kluva-?)mali sui vol jänälik dinosauras. Fädo sevob plu dö fösilav, kas mödikünans ba spetonsöv, bi daut bäldikün oba älelöfon elafi Utahraptor, ed anu lödob kobü löfan kilyelik elafa Tyrannosaurus rex. Kredab obik evemikumon in famül nolavilöföl obik, e koslogob fredo reidami lautoti dokana R. Bakker tefü dinosaur „obik“, kelafi ya fomälob as Honedagöb Macaränik läs fililöfik.[1]
Noets
[redakön • redakön fonäti]- ↑ Linglänapüko: Hungarian Horntail, drakabid in vol ela Harry Potter. Fonät saitota at binon bevüresodatopäd Museda Cilas di Indianapolis, kö patuvon vödem: Dragon-like Dinosaur at The Children’s Museum of Indianapolis is Named to Honor Harry Potter Author J. K. Rowling.
Literat
[redakön • redakön fonäti]- Bakker, R. T., Sullivan, R. M., Porter, V., Larson, P. e Saulsbury, S.J. 2006. Dracorex hogwartsia, n. gen., n. sp., a spiked, flat-headed pachycephalosaurid dinosaur from the Upper Cretaceous Hell Creek Formation of South Dakota." In: Lucas, S. G. e Sullivan, R. M., reds. Late Cretaceous vertebrates from the Western Interior. New Mexico Museum of Natural History and Science Bulletin, toum: 35, pads: 331–345. (Vödem rigädik, in Linglänapük.)
Yüms plödik
[redakön • redakön fonäti]In Linglänapük:
- El Dracorex lä bevüresodatopäd Museda Cilas di Indianapolis.
- Yeged: New dino gets name fit for a 'Potter' dragon.
- Fotografots ela Dracorex hogwartsia.