Leopold Einstein

Hiel Leopold Einstein (pämotöl ün 1834, ädeadöl ün 1890) äbinom tidan relik yudik, tedan e penan in Nürnberg. Ya ün 1883 älärnom ed äprimom ad propägidön Volapüki, ed ün yel sököl: 1884, ägetom diplomi tidana Volapüka (nüm: 55). Ün 1885 äpübom (in Deutänapük) lebuki dö jenav volapükas sis Leibniz jü atim.

Tü 1885 febul 18 äfünom eli Nürnberger Weltspracheverein (Volapükaklub di Nürnberg), kela presidan äbinom jü säcäl oka kodü maläd, ün 1888 febul 22. Äbinom Volapükan lanälik: äpropagidom ed äjelodom püki ela Schleyer me penäds deutänapükik za 200, äpuböls in gaseds mödik. Hiel Rupert Kniele, in lebuk oka: Das erste Jahrzehnt der Weltsprache Volapük (= Degyel balid valemapüka Volapük), vemo älobom vobodi omik.

Ün 1888 ye el Einstein ägetom de datuvan Sperantapüka, hiel L. Zamenhof, Buki Balid oma (La Unua Libro), ed äsludom ad slopikön Sperantamufi. Muls tel pos atos ya äpübom lebuki: La lingvo internacia als beste Lösung des internationalen Weltspracheproblems (= ‚La lingvo internacia‛ as tuved gudikün pro säkäd volapüka bevünetik). Älautom penädis mödik dö Sperantapük, so äjafölo stabi mufa at in Deutän, ebo ven tio änepubon in Rusän dub kods bolitik. Älautom samo tidabuki balid Sperantapüka ün 1888, kö (jiniko balidnaedo) äbespikom yufü taib kladi pönopas ed ladvärbas odis tefölas (Sperantapüko: la korelativoj, ü: la tabelvortoj). In buk at ävotükom degatis anik vödavulas.

Äsüadükom Volapükaklubi di Nürnberg ad slopikön Sperantapüki (kelos äjenon calöfiko tü 1888 dekul 18), e tü 1890 mäzul 25 klub at äläükon vödis: „Esperanto-klubo“ (= Sperantaklub) lü nem okik (Deutänapüko: Weltspracheverein). So ävedon ebo Sperantaklub balid vola, cifamü presidan: Christian Schmidt (pos malädikam ela Einstein). Klub at ye älüvon Sperantapüki ün 1894, pos daväl tefü revidamobs Sperantapüka (o.b., pos yels te mäl voba gönü Sperantapük). Ün 1901 ävotükon läükoti nema ok ad: „Klub de amiki de lingu universala“ (= klub flenas püka valemik), ed ün 1907 äslopikon eli ‚Ido‛, posä pük at äpubon. Grup votik Sperantapükanas ye älaidabinon, kela dugan ün 1909 äbinom lavogan Dokan Heinrich Orthal. Grup at ai nog dabinon.

Kodü seks maläda okik, el Einstein ädeadom tü 1890 setul 8, bäldotü yels te 56.

Lebuks

• 1888. La Lingvo Internacia als beste Lösung des internationalen Weltspracheproblems. Nürnberg: Verl. von J. A. Stein's Buch- & Kunsthandlung. 78p.
• 1889. Weltsprachliche Zeit- und Streitfragen: Volapük und Lingvo internacia. Nürnberg: Verl. von J. A. Stein's Buch- & Kunsthandlung. (Tradutod vödema at, in Fransänapük.)

Yüms plödik

• Lotanabuk Sperantagrupa di Nürnberg.