Teilamalül
Teilamalül (⸗ u ꞊) binon malül, kel teilon vödi ad lims tel u plu ka tel. Nesuvo penamasits pükas votik labons teilamalüli. Ma „Gramat Volapüka“ fa hiel Arie de Jong, malül at pagebon pö penam Volapüko, ab el de Jong it no ägebom teilamalüli e ägebom ai yümamalüli pla teilamalül, votiko sagölo: ägebom te yümamalüli.
Fom[redakön • redakön fonäti]
Teilamalül binädon me yümamalüls fagotaleigik tel. So teilamalül papenon as liens brefik fagotaleigik tel. Kösömo teilamalül binon slobik. Sagoy das sekü atos no kanoy binön kofudik demü leig malülas tel: teilamalül e leigamalül.
Geb[redakön • redakön fonäti]
In Volapük[redakön • redakön fonäti]
Ma „Gramat Volapüka“, mutoy gebön teilamalüli:
- üf vöd pateilon ad spikasilabs len fin kedeta;
- üf lim telid koboädavöda primon me mayud, as sam: Nolüda⸗Merop;
- üf lims bofik koboyümavöda binons leigalonöfiks, as sam: general⸗maredal, lampör⸗reg[1].
Do hiel Arie de Jong imobom teilamalüli, lätikumo äsludom ad no gebön malüli at, kel no pubon in püks mödikün. In Volapük teilamalüls plago pägebons te telna, sevabo pö dabük elas „Gramat Volapüka“ fa hiel ‚Arie de Jong‘ e ‚Wörterbuch der Weltsprache für Deutschsprechende‘ fa otan. Binos nitedik, das in „Gramat Volapüka“ pägebons teilamalüls stedik, kels ye äbinons brefikums e smalikums ka leigamalül e sümedons leigamalüls brefik. In vödabuk gretik Volapüka pro Deutänapükans teilamalüls äbinons slobiks.
In vödems nuik Volapükik yümamalül e teilamalül no distons de od.
In Yuropapüks[redakön • redakön fonäti]
Penäts ömik labons te teilamalüli ad teilön vödis, samo: penät gotik. Kösömo teilamalül binon slobik in penäts at (as sam, in fraktur). Penäts at binons vönädiks.
Teilamalül semikna jäfidon pro zeils lekanik e tediks (efe reklamiks) sekü vobed logovik nedotik. Samo, nem lotidöpa: ‚Waldorf⸗Astoria‘ päpenon calöfiko ko teilamalül vü yels 1949 e 2009.
In vödabuks ömik teilamalül dunon jäfidis tel: balido, malon fini vödalima, telido, malon fini kedeta. So pö jenet at yümamalül kösömik vedon teilamalül len fin kedeta, üf vöd no finikon ko kedet.
In vödabuks ömik ün tumyel degzülid ed ün begin tumyela teldegid pädabüköls ai ägeboy teilamalüli pö penam koboyümavödas pla yümamalül.
In püks votik[redakön • redakön fonäti]
Teilamalül pagebon as malül patik fa nolavans koptik.
Ma lotograf latinik di el ‚Fiero‘ pro pük: ‚Ojibwe‘ teilamalül papladon po foyümots ömik värbik len fin kedeta.
In silabapenät Kanadänik teilamalül pagebon as malül ad distidön sümbolis sümik, sevabo: malül at e mal silabik.
Pö jenets nesuvik teilamalül pagebon in vödems Yapänik pla yümamalül Linglänapükik e stripül püka ot, ven penoy foginavödis medü ‘katakana’. Kösömo in vödems Yapänik teilamalül papladon vü pösodanem e famülanem i vü foginavöds votik.
In el ‚Unicode‘[redakön • redakön fonäti]
Sit ela ‚Unicode‘ labon sümbolis sököl ad malön teilamalüli:
| Penät | Sümbol | Kot numik |
|---|---|---|
| Penät latinik (sümbol slobik) | ⸗ | 2E17 |
| Silabapenät Kanadänik | ᐀ | 1400 |
| Silabapenäts Yapänik, sevabo: ‚katakana‘ e ‚hiragana‘ | ゠ | 30A0 |
| Leigamalül brefik | ꞊ | A78A |
Literat[redakön • redakön fonäti]
- Arie de Jong. Gramat Volapüka. — Leiden (Nedän) : Brill, 1931.
- Arie de Jong. Gramat Volapüka. — Dabükot telid / Arie de Jong (lautan) ; Michael Everson (dabükan, lautan fonuna). — Evertype, 2012. — ISBN: 978-1904808947.
Yüms plödik[redakön • redakön fonäti]
- Bagaf se „Gramat Volapüka“.
- Yeged Linglänapükik
- Pad se sogädaresod ‘Facebook’: bespik säkäda tefü fom teilamalüla in pübots Volapükik.
- ↑ Arie de Jong. Gramat Volapüka. — Leiden (Nedän), 1931. — Bagafs: 6, 16, 34, 133.