Vükiped:Yeged adelo pevälöl/01/31

Lekelabinod elafa Edmontosaurus (patöfis elas Ornithischia jonöl - flan nedetik), se Mused Jenava Natik nivera di Oxford.

Elafs Ornithischia ü Predentata binon rood lifavik dinosauras honedilabik planifidik. Nem: Ornithischia binon koboyüm vödas Vöna-Grikänapükik ορνιθειος (= böda) ed ισχιον (= hipayoin). Binons sevädiks as „dinosaurs bödahipilabiks“ kodü hipabinod onsik, sümik ad ut bödas (do böds nulädik ibo licinons de elafs Saurischia ü „dinosaurs lasärahipilabiks“). Bi äbinons planifidafs, kels suvo älifons in grups, äbinons mödikums ka els Saurischia. Päyagons fa elafs Theropoda ed äbinons smalikums ka elafs Sauropoda.

Elafs Dinosauria pädilädons ad roods tel: Ornithischia e Saurischia fa hiel Harry Seeley ün 1887. Dilädam at, kel valemo pelasumon, stabon su volf lekela lüodü binod sümikum ad ut bödas (do böds no licinons de dinosaurs at), su pats pö virebs, su düfajelod plödik, e su lab boma „po-tutik“ (bom pluik föfü maxül, kel stäänükon oni). Bom at kontagons ko „po-maxülabom“ pö maxül löpik. Kobo fomons binodi honedafomik, kel pägebon ad kötön planis. (Yeged lölik...)