Ana Blandiana

Se Vükiped: sikloped libik
Ana Blandiana
Moted: Otilia Valeria Coman
25 mäzul 1942, 1942
Timișoara
Cal(s): jipoedan[*], jilautan[*], jigasediman[*], jibalädan[*], lautan literatava cilik[*], jitradutan[*]
Tatät(s): Rumän
Matan(s): Romulus Rusan[*]

Jiel Ana Blandiana (pemotöl ün 1942 mäzul 25, in zif: Timişoara) binon länem jiela Otilia Valeria Coman: poedan e komipan bolitik in Rumän atimik. Länem ofik dekömon de zifil palas ofik: Blandiana, nilü Vinţu de Jos, in ziläk: Alba County, Rumän.

Pos bükam poedotas balid oka ün 1959, lä gased: Tribuna in Cluj-Napoca (is ädispenof balidnaedo as Ana Blandiana), päpübof in poedakonlet 30 de poeţi tineri (Poedans yunik 30). Ün 1963, pos pübaproib folyelik, fino äpübof lä gased Contemporanul (päredaköl fa hiel George Ivaşcu).

Buk balid ofa (yelü 1964) äbinon Persoana intâia plural (Pösod balid plunuma), kela fonun päpenon fa hiel Nicolae Manolescu. Äsevädikof me buks: Calcâiul vulnerabil (Hil viodabik) ün 1966, ed A treia taină (Klänöf kilid) ün 1969. Ün 1966, Blandiana äkompenof balidnaedo pö Poedamäted Bevünetik (in Lathi, Suomiyän).

Ün 1967, älomädikof in Bucureşti; jü yel fovik, äbinof bal redakanas gaseda: Viaţa studenţească (Studanalif); pos atos (e jüesa 1975), ävobof as redakan gaseda: Amfiteatru. Telna äreidof poedotis oka in televid ün 1969, sogü hiel Andrei Şerban e dramatans Irina Petrescu, Mariana Mihuţ e Florian Pittiş.

Vü 1975 e 1977, äbinof bukeman lä Stitod Lekanas Jönik in Bucureşti. Ün 1976, tradutod Fransänapükik vobotas ofik päpübon balidnaedo, lä Anthologie du Club des Poètes (Konlet Kluba Poedanas), Paris; ün 1978, äkompenof pö Poedazäl Bevünetik Balid in Paris.

Finü tumyela 1980, to riskäd tatakas reiganefa kobädimik, jiel Blandiana äprimof ad lautön poedotis protestik, ägeükölo säkädis ai gretikum reigasita Rumänik.

Pos Levolut Rumänik yela 1989, äprimof lifi bolitik oka me komip pro moükam kobädimanas retöl guvanefa, ed i pro sogäd maifik. Vob poedik ofa ävedon läs veütik (do äplöpof ad pübön Arhitectura valurilor (Bumav Vefas) ün 1990, 100 de poeme (Poedots 100) ün 1991, e Sertarul cu aplauze (Layet labü Plods) ün 1992. Vobots ofik ya petradutons ini püks 16.