Hermann Philipps
| Moted: | 1944 |
| Cal(s): | Idist[*] |
| Tatät(s): | Deutän |
Hiel Hermann Philipps (pemotöl tü yel 1945) binom cifal 8id äd anuik Volapükanefa.
Lifajenotemil e jäfüdinol.
[redakön • redakön fonäti]Pemotom tü 1945 dekul 12 tö Bamberg in Frankän, Deutän. Dü julatim älödom tö ‚Frankfurt am Main’ . Pos julatim ädünädom pö krigaflitömem Deutänik, poso ästudom konömavi pö niver di ‚Frankfurt’. Pos finükam studüpa at ävobom pö fed dustoda kiemik tö ‚Frankfurt’, vobi kelik älecedom naütiki. Vüo ilärnom tradutavi ed ivedom tradutan e yufaredakan tö ‚London’ pö dabüköp gaseda kaenik bevünetik (ätradutom ini Deutänapük, zuo ägididom tefü prodam sotüla Deutänapükik gaseda pemäniotöl). Pos yels anik ägekömom de Linglän lü Deutän, kö jü plödüdünstad ävobom as tradutan livätik. Nu lödom tö ‚Bonn – Bad Godesberg’. Äpreparom dabüki dönuik tidabukas vönik ela Ido e Volapüka (‚http://hephi.de’). Nolom näi Deutänapük e Volapük nata⸗ e mekavapükis mödik, bevü votiks Danänapüki, Nedänapüki, Spanyänapüki, pükis votik Skandinänik, eli Afrikaans, eli Novial, eli Ido, eli ‚Toki Pona’, speranti. I nolom nünömaprogramavi.
Jäf tefü Volapük.
[redakön • redakön fonäti]Äprimom ad lärnön Volapüki ün 1994 danädü yeged sperantik tiädü „ ‚Enkoduko al Volapuko’ ” fa ‚Ed. Robertson’, kö ituvom i ladeti ela ‚Ralph Midgley’, ko kelan äprimükom spodi. Dü yels anik ‚Hermann Philipps’ äbejäfom Volapüki, ab dü lunüp äzedom atosi, bi no äcedom, das Volapük ölabon-la fütüri as pük bevünetik pro menef lölik. Dönu ävedom Volapükan jäfedik ün 2012 sekü kompen pö preparam dabükota nulik vödabuka Volapükik fa el Arie de Jong (1931). Demü nol dibätik Volapüka e natapükas ömik sökaleodiko ävedom in sog bevünetik Volapüka kadäman (2012, setul, 1), vicifal (2012, dekul, 1), cifal (2014, mayul, 1). Ädunodom as redakan ela „Vög Volapüka”: gased cifik Volapükanefa < de novul yela: 2014 jü prilul yela: 2020. Otüpo ädigitükom ed änotükom bevüresodo dokümis mödik Volapüki ätefölis, keninükamü gasedem (nüms elas „Volapükagased pro Nedänapükans”, „Sirkülapenäd”, „Vög Volapüka”).
As dilekan Volapükakadäma cifom vobi tefü vestig vödastoka Volapükik pos yel: 1931, preparom sotüli pelölöfüköl fövotas fa el Arie de Jong ad vödabuk gretik Vpa fa otan. I koräkom tradutodi Linglänapükik fa el Ralph Midgley vödabuka gretik ot (sevabo ela „Vödabuk Volapüka pro Deutänapükans” ko pübayel: 1931). As cifal binom vemo jäfedik e valöpakomik in Volapükavol, binom balan guvanas pö Volapükagrups sogädaresodas sevädik anik efe elas ‚Facebook’, ‚VKontakte’, ‚Reddit’.
Fonäts pegeböl.
[redakön • redakön fonäti]Hermann Philipps — kadäman nulik // Vög Volapüka. 2012. Nüm: 9. Pads: 68–69.
Pened cifala nulik: spets anik dö cifalam oba // Vög Volapüka. 2014. Nüm: 6. Pads: 44–45.
Nuns Volapükagrupa pö ‚Facebook’.
| Cifals | ||||