Alfred Hitchcock

Se Vükiped: sikloped libik
Bunön lü: nafam, suk
Hiel Alfred Hitchcock.

Hiel Sir Alfred Joseph Hitchcock (1899 gustul 13 - 1980 prilul 29) äbinom biomagodemidilekan ä -prodan Linglänik (poso i Lamerikänik) vemo flunilabik sekü metods omik stüla tenidik (thriller e suspense). Pos karier gudik in Linglän, äfealotädom lü Hollywood ed ädagetom tatäti Lamerikänik ün 1956, do äblebon i reigäb Linglänik. Ädilekom biomagodemis plu luldegis dü karier mäldegyelik, de timäd bioskopa müätik da ut bioskopa spiköl jü ut kölabioskopa. El Hitchcock äbinom balan dilekanas benosekikün ä sevädikünas dü lifüp okik, e jünu blebom sevädik ä pöpätik.

Famik sekü sev e kaen ela Hitchcock tefü tenid, biomagodems omik gebons mödo dredi e fomäli, e sevädons sekü cog „sägälik“ okas. Suvo jonons pösodis nedöbik dü dinäds, kelis no kanons bemastön ud igo suemön.

El Hitchcock pämotom e pädugälom in London, in Linglän. Äprimom dilekanakarieri okik ün 1922 in Linglän, ab sis 1939 ävobom ledino in Lamerikän. El Hitchcok e famül omik ädalabons farmi labü nem Cornwall Ranch ü „Belalad“ su bel finü Canham Road, love zif: Scotts Valley, in California, de 1940 jü 1972. Äremons domi telid finü 1942 su süt: Bellagio, nüm: 10957, in Los Angeles, visü el Bel Air Country Club. El Hitchcock ädeadom sekü leläsikam roinas ün 1980.[1]

El Rebecca äbinom biomagodem teik oma, kel ägeton premi: Oscar as biomagodem gudikün, do biomagodems votik fol oma pimobons; el Hitchcock neai ägetom premi dilekana gudikün. Ägetom premi: Irving Thalberg sekü lifaduinod okik ün 1967.

Literat[redakönredakön fonäti]

  1. McGilligan, Patrick. 2003. Alfred Hitchcock: A life in darkness and light. New York: HarperCollins.