Lalgorit Geredik

Se Vükiped: sikloped libik
Bunön lü: nafam, suk

Lalgorit Geredik (LG ü GA) binon metod gudükünamik in nünömav. Binon sukalalgorit kel gebon prinsipi volfa. Brefo, pöp tuvedotas fädik panemöl balats pajafon, kel volfon nenatiko jüs bal vedon kotenüköli.

Lalgorit geredik stabik pädatikon fa hiel John Holland ün 1972, in buk: „Adaptation in Natural and Artificial Systems“. Lalgorit geredik, e lalgorits volfik votik, pegebons sekaliegiko ko säkäds difik mödik. Säkäds samik binons: vegamataibs, dils flitömas, platots leäktronik, e stir vobianas.

Numovotafomam[redakönredakön fonäti]

Dabinons dins tel kelis mutoy dunön pro LG. Balido, mutoy votafomön binodi uta kel poprodon, ad lised numas. Liseds at panemons kromosoms e nums onsik panemons gereds. Ekö sam fasilik: disinam taba nomik ko lögs fol e sürfat folliena stedagulik. Dabinons nums kil: lunot e vidot sürfata, e geilot löga alik. If givoy numis fädik kil (kels binons in portat), getoy tabi fädik.

Ven edatikoy numovotafomami, ejafoy sukaspadi säkäda: konlet tuvedotas mögik valik. Du volfon, pöp vestigon spadi at.

Lönedasekät[redakönredakön fonäti]

Din telid keli mutoy is dunön, binon jafön lönedasekäti. At binon sekät kel jonon gudi balata alik. Plü balat binon gudik, plü num pünätas pagivon one. Pro sam taba: if tab padesinon pro mens gretik mäl, pogivonöv pünätis pro lögs gretikum, ed operonöv pünätis pro binön tu gretik u tu smalik, adas mens mäl kanons seidön zü on.

Me lönedasekät, kanoy nolön gudi balata seimik.

Lalgorit[redakönredakön fonäti]

Lalgorit stabik binädon in dils sököl.

  • 1. Jafolöd pöpi primik fädik balatas.
  • 2. Blufolöd balati alik me lönedasekät.
  • 3. If kod stöpik pakotenükon, stöpolöd.
  • 4. Välolöd pöpi nulik se bäldik, me pünäts.
  • 5. Dunolöd tölatis geredik sui pöp nulik.
  • 6. Gololöd jü dil 2id.

Dil veütikün binon välam pöpas nulik; nen välam, volf no kanon jenön. Välam proporikrulätik) binon metod kösömikün välama. In metod at, pöp nulik alik paprodon dub balat bal pos votik: mödot pünätas keli balat dalabon, leigon luverati das povälamon sökölo. Kodü atos, balats gudikum vedons mödikumis, e balats badikum vedons nemödikumis. Binos „lailif lönedikünas“.

Dils veütik i binons tölats geredik, kels binons luvotükam e gereditök. Luvotükam binon luverat vemo smalik das gered povotükon. Samo, if gereds binons els bit, bal vedonöv seri e ser vedonöv bali. Tölat gereditöka sumon balatis tel e tökon geredis anik onas. Sot stabikün binon plad-bal: plad pasesukon su kromosom, e gereds valik po plad et patökons. Sots votik ninädons plad-tel e fädik.

Stöpoy lalgoriti ven kod(s) stöpik pakotenükon(s). Kods sömik kösömik binons: balat dabinon, tuvedot kela kotenükon; tim tu mödik pebinon; pöp volfon no plu.