Yuliya Tümojänko

**Yuliya Tümojänko**

Moted:	Юлія Володимирівна Грігян 27 novul 1960 Dnipro
Cal(s):	jikonömavan[], jibolitan[], jidunikan[*]
Tatät(s):	Sovyätabalatam, Lukrayän
Matan(s):	Oleksandr Tymošenko[*]
Cil(s):	Jevhenija Tymošenko[*]
Pal(s):	Volodymyr Hrihyan[], Lyudmila Telehina[]
Dispenäd:

Jiel ‚Yuliya Volodümürivna Tümojänko’ (Lukrayänapüko: ‚Юлія Володимирівна Тимошенко’; pemotöl tü 1960 novul 27) binof konömavan ä bolitan Lukrayänik. Äbinof balidministeran Lukrayäna de yanul 24 jü setul 8 yela: 2005, e de 2007 dekul 18 jü 2010 mäzul 4. Binof dugan paleta: ‚Всеукраїнське об'єднання „Батьківщина“’ (Balatam Valalukrayänik: „Lomän“), kel jü yel: 2011 ‹ äduton lü ‚Блок Юлії Тимошенко’ (Paletafed jiela ‚Yuliya Tümojänko’).

Büä ävedof jibalidministeran balid Lukrayäna, el ‚Tümojänko’ ibinof balan duganas veütikün levoluta rojanik. Ün period at, gaseds vesüdänik anik änäinemons ofi eli „Jeanne d'Arc“ levoluta.^[1] Tü 2005 yulul 28, timapenäd: ‚Forbes Magazine’ änemon ofi, ya balidministeran, kilidani bevü voms nämädikün vola (kobü jiel ‚Condoleezza Rice’ e jiel ‚Wu Yi’).^[2]

Bü prim kariera bolitik ofa, el ‚Yuliya Tümojänko’ äbinof büsidan benosekik ab pedöbatöl in dustod gasina, kel eliegükon ofi. Dü yels: 1999–2001 ‹ äbinof kolatameina⸗ ä namätaministeran in ministeranef hiela ‚Viktor Yujcänko’. Pos levolut rojanik ‚Yujcänko’ ävedom presidal Lukrayäna e ‚Tümojänko’ ävedof balidministeran, ab päsäcälof pos muls vel sekü konflit ko presidal. Pos dailidaväls yela: 2007 ‹ ‚Tümojänko’ telidnaedo ävedof balidministeran.

In presidalidaväls yela: 2010 ‹ in Lukrayän ‚Tümojänko’ ägaenof 45,5% vögodas, sodas äfinikof in plad telid po hiel ‚Viktor Yanukovüc’. Pos daväls peperöl ‚Tümojänko’ äsädünikof as balidministeran. Ävedof cif taätanefa ta presidal nulik ä taan gretikün ofa: ‚Yanukovüc’. Ün gustul yela: 2011 ‹ päfanäbükof kodü minilud remäda e poso i komit sasena, ab mödikans äcedons, das cödät ofa pämotivon bolitiko. Cödalef Yuropik demü menagitäts äcödon ün 2013, das fanäbam ofa äbinon negitik ä nelonik, ed äkrütöl träiti mimenik ofa.^[3] Pas tü 2014 febul 22, del ot, ven dail Lukrayänik äsäcälon presidali: ‚Yanukovüc’, pästadükof libio sekü levolut diga. Ün prilul yela ot ‚Yuliya Tümojänko’ pälibocödetof ä pästimigeedof fa cödal löpikün Lukrayäna.

Äbinof dönu steifädan in presidalidaväls yelas: 2014 e 2019, ab nensekiko: ägaenof tefädo pladi telid (12,8% vögodas) e kilidi (13,4%). Atimo binof cif paleta ofik in löpacäm: dail Lukrayänik.

Literat

↑ Westcott, Kathryn. The queen of Ukraine's image machine. BBC News. Pekonsulton tü 2007 tobul 5.
↑ McDonald, Elizabeth e Chana R. Schoenberer. The 100 Most Powerful Women. 2005 yulul 28. Pekonsulton tü 2007 tobul 5.
↑ Tadeusz A. Olszański. Werdykt Europejskiego Trybunału Praw Człowieka w sprawie Tymoszenko. OSW (Centre for Eastern Studies), 2013 mayul 8. Pekonsulton tü 2022 dekul 17.

[1] Westcott, Kathryn. The queen of Ukraine's image machine. BBC News. Pekonsulton tü 2007 tobul 5.

[forbes-2] McDonald, Elizabeth e Chana R. Schoenberer. The 100 Most Powerful Women. 2005 yulul 28. Pekonsulton tü 2007 tobul 5.

[3] Tadeusz A. Olszański. Werdykt Europejskiego Trybunału Praw Człowieka w sprawie Tymoszenko. OSW (Centre for Eastern Studies), 2013 mayul 8. Pekonsulton tü 2022 dekul 17.

[1]

[2]

[3]