Yuliya Tümojänko

Se Vükiped: sikloped libik
(Pelüodükon de pad: Yuliya Tümosyenko)
Yuliya Tümojänko
Flickr - europeanpeoplesparty - EPP Congress Bonn (781).jpg
Moted: Юлія Володимирівна Грігян
27 novul 1960
Dnipro
Cal(s): jikonömavan[*], jibolitan[*], dunikan[*]
Tatät(s): Sovyätabalatam, Lukrayän
Matan(s): Oleksandr Tymoshenko[*]
Cil(s): Yevhenia Tymoshenko[*]
Pal(s): Volodymyr Hrihyan[*], Lyudmila Telehina[*]
Dispenäd:
Yulia Tymoshenko's signature.jpg

Jiel ‚Yuliya Volodümürivna Tümojänko’ (Lukrayänapüko: ‚Юлія Володимирівна Тимошенко’; pemotöl tü 1960 novul 27) binof konömavan ä bolitan Lukrayänik. Äbinof balidministeran Lukrayäna de yanul 24 jü setul 8 yela: 2005, e de 2007 dekul 18 jü 2010 mäzul 4. Binof dugan paleta: ‚Всеукраїнське об'єднання „Батьківщина“’ (Balatam Valalukrayänik: „Lomän“), kel jü yel: 2011 ‹ äduton lü ‚Блок Юлії Тимошенко’ (Paletafed jiela ‚Yuliya Tümojänko’).

Jiel ‚Tũmosyänko’ ko presidal Tatas⸗Pebalöl: ‚George W. Bush’ ün prilul yela: 2008.

Büä ävedof jibalidministeran balid Lukrayäna, el ‚Tümojänko’ ibinof balan duganas veütikün levoluta rojanik. Ün period at, gaseds vesüdänik anik änäinemons ofi eli „Jeanne d'Arc“ levoluta.[1] Tü 2005 yulul 28, timapenäd: ‚Forbes Magazine’ änemon ofi, ya balidministeran, kilidani bevü voms nämädikün vola (kobü jiel ‚Condoleezza Rice’ e jiel ‚Wu Yi’).[2]

Bü prim kariera bolitik ofa, el ‚Yuliya Tümojänko’ äbinof büsidan benosekik ab pedöbatöl in dustod gasina, kel eliegükon ofi. Dü yels: 1999–2001 ‹ äbinof kolatameina⸗ ä namätaministeran in ministeranef hiela ‚Viktor Yujcänko’. Pos levolut rojanik ‚Yujcänko’ ävedom presidal Lukrayäna e ‚Tümojänko’ ävedof balidministeran, ab päsäcälof pos muls vel sekü konflit ko presidal. Pos dailidaväls yela: 2007 ‹ ‚Tümojänko’ telidnaedo ävedof balidministeran.

In presidalidaväls yela: 2010 ‹ in Lukrayän ‚Tümojänko’ ägaenof 45,5% vögodas, sodas äfinikof in plad telid po hiel ‚Viktor Yanukovüc’. Pos daväls peperöl ‚Tümojänko’ äsädünikof as balidministeran. Ävedof cif taätanefa ta presidal nulik ä taan gretikün ofa: ‚Yanukovüc’. Ün gustul yela: 2011 ‹ päfanäbükof kodü minilud remäda e poso i komit sasena, ab mödikans äcedons, das cödät ofa pämotivon bolitiko. Cödalef Yuropik demü menagitäts äcödon ün 2013, das fanäbam ofa äbinon negitik ä nelonik, ed äkrütöl träiti mimenik ofa.[3] Pas tü 2014 febul 22, del ot, ven dail Lukrayänik äsäcälon presidali: ‚Yanukovüc’, pästadükof libio sekü levolut diga. Ün prilul yela ot ‚Yuliya Tümojänko’ pälibocödetof ä pästimigeedof fa cödal löpikün Lukrayäna.

Äbinof dönu steifädan in presidalidaväls yelas: 2014 e 2019, ab nensekiko: ägaenof tefädo pladi telid (12,8% vögodas) e kilidi (13,4%). Atimo binof cif paleta ofik in löpacäm: dail Lukrayänik.

Literat[redakönredakön fonäti]

  1. Westcott, Kathryn. The queen of Ukraine's image machine. BBC News. Pekonsulton tü 2007 tobul 5.
  2. McDonald, Elizabeth e Chana R. Schoenberer. The 100 Most Powerful Women. 2005 yulul 28. Pekonsulton tü 2007 tobul 5.
  3. Tadeusz A. Olszański. Werdykt Europejskiego Trybunału Praw Człowieka w sprawie Tymoszenko. OSW (Centre for Eastern Studies), 2013 mayul 8. Pekonsulton tü 2022 dekul 17.