J. R. R. Tolkien

Se Vükiped: sikloped libik
Bunön lü: nafam, suk
Hiel J. R. R. Tolkien ün 1916.

Hiel John Ronald Reuel Tolkien (1892 yanul 3 - 1973 setul 2) äbinom pükavan, lautan ä profäsoran Linglänik, sevädik as lautan lebukas: The Hobbit e The Lord of the Rings (= Söl Linas). Äbinom profäsoran Vöna-Linglänapüka in niver di Oxford de 1925 jü 1945 e poso profäsoran Püka e Literata Linglänikas de 1945 jü 1959. Äbinom romakatulan fiedik. Äbinom flen gudik hiela C. S. Lewis; bofikans ädutoms lü bespikagrup literatik no calöfik: el Inklings. Päcälom Büdan Roda Lamporäna Britänik (C.E.B.) fa jireg: Elizabeth II tü 1972 mäzul 28.

Näi lebuks: Hobbit e Söl Linas, son ela Tolkien: Christopher Tolkien äpübom vobotis votik stabü penets fata okik. Vobots ats (kels keninükons eli Silmarillion famik) e votiks fomons kobo yumed gretik konotas, jenotemas e pükas pedatikölas, ed i yegedas literatik dö vol pefomälöl labü nem: Arda, e patiko Zänoda-tal (in Linglänapük: Middle-earth (pedefomöl de fom pelinglänüköl vöda Vöna-Norgänapükik: Miðgarðr : län fa mens pabelodöl ma miteodem germik), kel kanoy dientifükön as „paset votik“ vola obsik. El Tolkien ägebom vödi: legendarium (= konädem) tefü lautots valik at.

To lautans votik ipübons literatotis magälik bü el Tolkien,[1] benosek legretik e flun lunüpik vobotas omik äkodons cedi pöpedik, das äbinom fatan literata magälik nulädik[2] - u kuratikumo: fatan „magälaliterata löpik“[3] Hiel L. Sprague de Camp e votikans cedons omi „fatani magälaliterata nulädik“ kobü hiel Robert E. Howard (jafam ela Conan: Barbaran).[4][5] Alo el Tolkien nendoto eflunom levemo lautotis posik e magälaliterati in valem.

Literat[redakönredakön fonäti]

  1. Camp, L. Sprague de. 1976. Literary Swordsmen and Sorcerers: The Makers of Heroic Fantasy. Arkham House. ISBN 0-87054-076-9. (Lautan mäniotom hielis William Morris, George MacDonald, Robert E. Howard and E. R. Eddison.)
  2. Mitchell, Christopher. J. R. R. Tolkien: Father of Modern Fantasy Literature. (Google Video). Sökod: "Let There Be Light" (Binosöd lit). University of California Television. Pekonsulton tü 2006 yulul 20.
  3. Clute, John, e John Grant (red.). 1999. The Encyclopedia of Fantasy. St. Martin's Press. ISBN 0-312-19869-8.
  4. Westfahl, Gary (red.). 2005. The Greenwood Encyclopedia of Science Fiction and Fantasy: Themes, Works, and Wonders. Greenwood Press. ISBN 0-313-32950-8.
  5. Camp, L. Sprague de. 1976. The Miscast Barbarian: Robert E. Howard' in lebuk löpo pemäniotöl: Literary Swordsmen and Sorcerers: The Makers of Heroic Fantasy.