Francisco Valdomiro Lorenz

Se Vükiped: sikloped libik
Bunön lü: nafam, suk
Hiel Francisco Valdomiro Lorenz yelü 1892.

Hiel Francisco Valdomiro Lorenz (Tsyegänapüko: František Vladimír Lorenc; 1872 dekul 24 in Zbyslav, ettimo in Lösterän-Macarän, atimo in Tsyegän - 1957 mäzul 24 in Porto Alegre, Brasilän) äbinom Volapükan ä Sperantapükan Tsyegänik, kel älifädom dili gretikum lifüpa okik in Brasilän. Äbinom polüglot (äsevom pükis plu jöldegis) ä lautan lebukas plu tumas, kelas 56 päpübons. Äbinom i laniman ä spirutan; mödiks lautotas omik tefons lifi relik e dabini lananas (ätradutom ini Sperantapük vödemi hindutik: „Bhagavad-Gita“). Äbinom i strologan: dü yels mödik äpübom „Kaledi Tikama“ (Almanaque do Pensamento, in Portugänapük): kaled strologik, kel jünu nog dabinon. Äbinom liman ela Círculo Esotérico de Comunhão do Pensamento (Zirkül Soterik Komuina Tikama). Äbinom „dokan kabaala“ sogoda: Rosadakrod; äbinom i libamasonan.[1]

El Lorenz pämotom in vilag: Zbyslav, son hiela František Lorenc: mülan pävobüköl jiela, e jiela Tereza (Viktová pimotöla) ed älabon svistis fol. In Kolín, bäldotü lifayels te degluls, älärnom Volapüki. Pos yels tel ye äprimom ad lärnön Sperantapüki, ed ävedom slopan lanälik ona: älautom tidabuki balid Sperantapüka pro Tsyegänans, ya ün 1890 päpüböli, mö yels te kils pos pub ela „Unua Libro“ (Buk Balid) hiela Zamenhof. Ün 1889 ätidom Sperantapüki in lötidöp: „U Pŝtrosů“, in Praha. Sperantamuf in Praha älabon ettimo kaladi bolitik (pro püd valemik e pro votikam sogäda), kelos no äpliton reiganefi Lösteränik-Macaränik. Klu ün 1893, sekü kods bolitik, ämutom lüvön lomäni okik, ed ävegom lü Brasilän. Ün 1894, pos fikuls mödik, älomädikom in vilag: São Feliciano, in tat: Rio Grande do Sul, kö äfeilom e (lätikumo) ävedom julatidan.

Äbinom go jäfedik pö Sperantamuf in Brasilän. Älautom bali tidabukas famikün püka at: eli „Esperanto sem Mestre“ (Sperantapük nen tidan). Älautom ed ätradutom mödikosi in Sperantapük ed in Portugänapük tefü rel e koult, ed i tefü püks mödik. Spirutans kredons, das äbinom el medium, e das äpenom, dub flun lananas, nunis mödik onsik in e dö Sperantapük. Pos deadam omik, medü el mediums: Francisco Xavier, jiniko äpenom ün 1976 buki pluik bal: „Esperanto kiel Revelacio“ (Sperantapük as Dasevädükam).

Do äpübom nosi dö Volapük, jiniko no äglömom oni: ün 1930, ma Volapükagased pro Nedänapükans (1932, nüm: 6, pad: 33), ägetom de cifal telid: Dr. Albert Sleumer, diplomi stimalimana.

Nog dabinon in zif: Santos, in Brasilän, Sperantaklub labü nem omik. In län at dabinon i Dabüköp Spirutik: „Francisco Valdomiro Lonrenz“ (no Sperantapükik). In zif: Porto Alegre topon libamasonef labü nem omik. Dabinon i süt labü nem omik, in zif: Americana.

Yüms plödik[redakönredakön fonäti]

  1. Joan Francés Blanc, "O Lorencovi", in František Vladimír Lorenc, Úplná učebnice mezinárodní řeči dra. Esperanta, Edicions Talvera, Vert-Saint-Denis, 2012, ISBN 979-10-90696-20-4