Jimi Hendrix

Se Vükiped: sikloped libik
Bunön lü: nafam, suk
Jimi Hendrix (1967)

Hiel Jimi Hendrix (1942 novul 27 - 1970 setul 18) äbinom gitaran, kanitan ä kanitilautan Lamerikänik. El Hendrix palecedom bal gitaranas letälenikün ä flunilabikünas jenotema musigastüla: rock.[1] Pos benosek in Linglän, ädagetom fami zi vol lölik pos kompenam omik pö el Monterey Pop Festival yela: 1967. Poso, el Hendrix äkompenom i pö el Woodstock Festival famik yela: 1969.

El Hendrix äyufon ad jafön kaeni nulik: el guitar feedback, kelos älüükon ini musig utosi, kelos büo äbinon ton no vipabik. Ägebom ed ävölfom nulodis e flunis stülanas ela blues äs hiels B.B. King, Muddy Waters, Albert King e T-Bone Walker, ed ägudükumom stüli okik stabü gitarans äs hiels Curtis Mayfield, Steve Cropper e Cornell Dupree, äsi stabü el jazz vönaoloveik. Pats anik posödöfa städik tuik oma ba dekömons de uts ela Little Richard, ko kel ävobom brefüpo as liman musiganefa ela Richard: The Upsetters. Palecedos i, das el Hendrix päflunom fa hiel Pete Townshend grupa: The Who, kel äkaniton in London ven el Hendrix äprimom karieri okik us ün 1966. Hiel Carlos Santana emobom, das musig ela Hendrix ba peflunon fa blud lindiyanik oma.[2]

El Hendrix ätöbidom ad kobükön utosi, kelosi änemom eli earth (tal): ritmut stüla elas blues, jazz e funk , ed eli space (spad): tonis löpikün ä lanijonölis (psychedelic), kelis äfägom ad jafön me gitar okik. As prodan musigasirkotas, el Hendrix ägebom registaröpi ön mods nulik: äbinom balan balidanas, kels äsperimäntons me tonodis telfonätik (stereophonic sound) e me stadädam (phasing) dü registaram.

El Hendrix pänüdugom ini el Rock and Roll Hall of Fame (Famamused Musiga: Rock and Roll) ün 1992 ed ini el UK Music Hall of Fame (Famamused Musiga Britänik) ün 2005. Stel omik su el Hollywood Walk of Fame (Famasüt di Hollywood) pädedieton ün 1994. Ün 1996, labun balid omik: Are you experienced pelasumon fa Netabür Kipedama Siroktas Lamerikänik (National Recording Preservaton Board). Ün 2003, timapenäd: Rolling Stone ägevon ele Jimi Hendrix pladi balid su lised onik gitaranas letälenikün 100 musigajenotema.[3]

Literat[redakönredakön fonäti]

  1. The Jimi Hendrix Experience. Induction year: 1992, pepüböl fa: The Rock and Roll Hall of Fame and Museum, Inc.. Pekonsulton tü 2007 setul 19.
  2. Carlos Santana on Jimi Hendrix. Pepüböl fa UniVibes ün febul yela: 1995. Pekonsulton tü 2007 setul 18.
  3. The 100 Greatest Guitarists of All Time. Pepübon tü 2003 gustul 27.