Lalgorit Geredik

Se Vükiped: sikloped libik
Bunön lü: nafam, suk

Lalgorit Geredik (LG ü GA) binon metod gudükünamik in nünömav. Binon sukalalgorit, kel gebon prinsipi volfa. Brefiko, pöp tuvedotas fädik (panemü: balats) pajafon, kel volfon nenatiko jüs bal vedon kotenükik.

Lalgorit geredik stabik pädatikon fa hiel John Holland ün 1972, in buk: „Adaptation in Natural and Artificial Systems“. Lalgorit geredik, e lalgorits volfik votik, pegebons sekaliegiko ko säkäds difik mödik. Säkäds samik binons: vegamataibs, dils flitömas, platots leäktronik, e stir vobianas.

Numovotafomam[redakönredakön fonäti]

Dabinons dins tel, kelis mutoy dunön pro LG. Balido, mutoy votafomön binodi uta, kel poprodon, ini lised numas. Liseds at panemons kromosoms e nums onas panemons gereds. Ekö sam fasilik: disinam taba nomik ko lögs fol e sürfat folliena stedagulik. Dabinons nums kil: lunot e vidot sürfata, e geilot löga al. If givoy nums fädik kil (kels binons in portat), getoy tabi fädik.

Ven edatikoy numovotafomami, ejafoy sukaspadi säkäda: konlet tuvedotas mögik valik. Du volfon, pöp vestigon spadi at.

Lönedasekät[redakönredakön fonäti]

Din telid, keli mutoy is dunön, binon jafön lönedasekäti. At binon sekät, kel jonon gudi balata al. Plü balat binon gudik, plü num pünätas pagivon one. Pro sam taba: if tab padesinon pro mens gretik mäl, pogivonöv pünätis pro lögs gretikum, ed operonöv pünätis pro binön tu gretik u tu smalik, adas mens mäl kanons seidön zü on.

Me lönedasekät, kanoy nolön: viogudik binon balat al.

Lalgorit[redakönredakön fonäti]

Lalgorit stabik binädon in dils sököl.

  • 1. Jafolöd pöpi primik fädik balatas.
  • 2. Blufolöd balati al me lönedasekät.
  • 3. If kod stöpik pakotenükon, stöpolöd.
  • 4. Välolöd pöpi nulik se bäldik, me pünäts.
  • 5. Dunolöd tölatis geredik sui pöp nulik.
  • 6. Gololöd jü dil 2.

Dil veütikün binon välam pöpas nulik; nen välam, volf no kanon jenön. Välam proporikrulätik) binon metod kösömikün välama. In metod at, pöp nulik al paprodon dub balat bal pos votik: num pünätas, keli balat dalabon, leigon luverati, das povälamon sökölo. Kodü atos, balats gudikum vedons mödikums, e balats badikum vedons nemödikums. Binos „lailif lönedikünas“.

Dils veütik i binons tölats geredik, kels binons luvotükam e gereditökam. Luvotükam binon luverat vemo smalik, das gered povotükon. As sam, if gereds binons els bit, bal vedonöv ser e ser vedonöv bal. Tölat gereditökama sumon balatis tel e tökon geredis an onas. Sot stabikün binon plad-bal: plad pasesukon su kromosom, e gereds valik po plad et patökons. Sots votik ninädons: plad-tel e fädik.

Stöpoy lalgoriti ven kod(s) stöpik pakotenükon(s). Kods sömik kösömik binons: balat dabinon, tuvedot kela binon kotenükik; tim tu mödik pebinon; pöp volfon no plu.