Leicester City F.C.

El Leicester City Football Club binon futaglöpädaklub di Leicester, Linglän. Pledon in el „King Power Stadium“ (nem büik: „Walkers Stadium“) kel labon seadöpis 32 500. Näinem onik binon Renars e jit pledanas binon blövik.

Ün 2016, ta spet, klub ägaenon eli Premier League balidnaedo, ed ün 2017 ärivon finamätis foldilik ela Champions League. Ün 2021 ägaenon balidnaedo eli FA Cup, pos erivöl büiko finamäti folna nes gaenön.

Päfünon ün 1884 nemü „Leicester Fosse,“ ed ädutikon lü kvipef telid Futaglöpädasita Linglänik ün 1894. Äpledon su spotöps anik dü yels primik oka. Ün 1891, äfealotädon ini el „Filbert Street,“ kö äblibon jüs 2002.

Pledans famikün ona binoms hiel Arthur Chandler, kel ädunom zeilis mödikün pro klub; hiel Gordon Banks, kel äbinom zeiligaledan Lingläna pö Volaleköpäd yela 1966, pö kel Linglän ävikodon; hiel Peter Shilton, kel äbinom leigo zeiligaledan pro Linglän; hiel Gary Lineker, kel ädunom zeilis mödikün pö Volaleköpäd yela 1986; e hiel Jamie Vardy, kel ün 2015 novul ädunom zeili in mät sökedik degbalid, kelos binon rekord ela Premier League.

Cifs sekaliegikün ona binoms hiel Johnny Duncan, kel id äbinom pledan; hiel Matt Gillies, kel ägaenom eli League Cup yela 1964, e kel ärivom finamäti ela FA Cup telna; hiel Jimmy Bloomfield; hiel Martin O'Neill, kel ägaenom eli League Cup yelas 1997 e 2000; hiel Nigel Pearson, kel äfödom oni telna; hiel Claudio Ranieri, kel ägaenom eli Premier League; e hiel Brendan Rodgers, kel ägaenom eli FA Cup.